Gin-ako sang Department of Migrant Workers (DMW) nga daku ang kabudlayan sa repatriation sa 63 ka mga Pinoy sa Haiti sa tunga sang nagakinatabo nga gang violence.
Lakip sa namensyonar ni DMW officer-in-charge Hans Cacdac amo ang sirado nga international airport amo man ang mabudlay kag delikado nga byahe pakadto sa kapital nga Port-au-Prince.
Una na ginsiling ni Cacdac nga posible nga subong nga semana mapatigayon ang pagpabalik sa mga Pinoy diri sa Pilipinas.
Una naman nga ginpasaka sang Department of Foreign Affairs (DFA) ang alert level sa Haiti sa Level 3 kun sa diin nagakahulugan na ini sang voluntary repatriation sa Filipinos bangud sa indi estable nga sitwasyon sang seguridad.
May 169 ka mga Pinoy nga nagatinir sa Haiti kun sa diin base sa rekord sang otoridad, kadam-an ang nagatrabaho sa Port-au-Prince.
Padayon naman ang komunikasyon sang DFA kag Philippine Embassy sa Washington para sa pagtinguha nga mapapauli sa Pilipinas ang Filipino nationals nga naipit sa kinagamo sa amo nga pungsod.#
