Ginkumpirma na sang General Elections Commission ang kadalag-an sang kontrobersyal nga former special forces commander kag subong defense minister sang Indonesia nga si Prabowo Subianto bilang bag-o nga presidente sang pungsod.
Nakaangkon sanday Prabowo kag ang iya vice-presidential running mate nga si Gibran Rakabuming Raka sang masobra 96 million votes nga ginapahayag 58.6 percent sang total count kag bastante na agud nga mabulsa ang first-round majority.
Antes sini, nauna na sanday Prabowo kag Gibran —ang kamagulangan nga anak ni outgoing leader Joko Widodo —sa pagdeklarar sang ila nga kadalag-an sang nagligad nga bulan matapos nga nakit-an sa unofficial counts nga nadag-an nila ang majority sa Indonesia.
Nangin daku nga parte sang kadalag-an ni Prabowo suno sa mga eksperto amo ang iya nga nationalist verve sa populist speeches, ang strongman credentials bilang defense minister, kag ang suporta halin sa anay kasumpong sini sa presidential election nga si Widodo ukon mas kilala nga Jokowi.
Nagpasalig naman ang duha ka mga nalutos sa eleksyon sa pagka-presidente nga magapasaka sila sang reklamo sa Constitutional Court bangud sa iregularidad kag mga alegasyon sang dinayaay nga natabo sa eleksyon. Apisar sini, kumpyansa ang kampo ni Prabowo sa resulta bangud sa ila ginpahayag nga majority kag wide margin sang kadalag-an.
Si Prabowo ang naga-edad na sang 72-anyos kag nalamhitan ang pangalan sang wala-tuo nga mga akusasyon sang pagpang-abuso sa kinamatarong sang mga tawo.
Napahalin ini anay sa militar bangud sa espekulasyon sa rights abuse, na-exile sa Jordan, kag na-ban man anay sa pagtapak sa Estados Unidos sang Amerika.
Nangin asawa man sini anay ang anak sang anay diktador sang Indonesia nga si Suharto nga nagpamuno sa pungsod sa sulod sang tatlo ka dekada halin sang 1967 tubtub sang 1998. Bangud sang iya kaangtanan kay Suharto, nangin decorated captain siya sa Indonesian Army special forces command tubtub nga nangin pinakabata nga heneral sa Indonesia sa edad nga 47. #
