Gintuman sang Kamara ang promisa sini nga aprubahan ang Resolution of Both Houses No.7 ukon ang economic Charter change (Cha-cha) measure antes magpahuway ang mga mamadlidha para sa Holy Week.
Kagab-i sang ginpasar sang House ang amo nga hagna sa third and final reading matapos nakakuha sang 288 yes, 8 ka no, kag duha ka abstentions.
Lakip sa tuyo sini nga amyendahan sa 1987 Constitution amo ang pagpasulod sang foreigners kag pagpahanugot sa ila nga pagpanag-iya sa pila ka importante nga bahin sang industriya sa pungsod.
Suno kay Speaker Martin Romualdez, ang ginduso nga pagkakas sang constitutional limitations sa foreign ownership ang makahatag sang linibo ka mga trabaho para sa mga Pinoy.
Isa man sa talalupangdon nga ginpasar sa ulihi nga adlaw sa Kamara antes ang break para sa Semana Santa amo hagna nga nagaduso nga i-revoke ang prangkisa sang Swara Sug Media Corporation nga naga-operate sang Sonshine Media Network International (SMNI) nga ginapahayag ginapanag-iyahan ni Pastor Apollo Quiboloy.
Napasar ini sa third and final reading sa boto nga 284 ka yes, 4 ka no, kag 4 ka abstentions. Gin-aprubahan ini matapos nakit-an ang franchise violations lakip na ang pagpalapta sang sala nga mga impormasyon kag mga red tagging.
Antes ang pagtakop sang session, nag-deliver sang speech si Speaker Romualdez kun sa diin gindayaw sini ang impresibo nga performance sang mga kongresista lakip na sa pag-apruba sa 19 tanan ka mga priority measures sang Marcos Administration antes ang natalana nga schedule.
Ginpabugal ni Romualdez nga nahimo nila ang ila nga assignment kag wala sang backlog sa trabaho.
Nahibaluan nga ang deadline sang approval para sa mga hagna lakip sa Legislative Executive Development Advisory Council (LEDAC) priority measures ang naka-set pa sa Hunyo subong nga tuig.
Magalawig ang break sang Kongreso tubtub sa Abril 28.
