Malapit duha ka oras nga na-trap sa sulod sang elevator sa building sa Mandaluyong si National Economic and Development Authority (NEDA) Secretary Arsenio Balisacan kag ang iya nga staff.
Pakadto kuntani ang tiglikom sa 34th floor sa opisina sang ahensya agud nga pirmahan ang Implementing Rules and Regulations (IRR) sang Public Private Partnership (PPP) Code apang sang hinali lamang, nag-malfunction ang elevator.
Yara sa 10 ka mga tawo ang upod sang tiglikom sa sulod sang elevator sang nag-untat ini sa ika-19 nga panalgan.
Ginpahayag ni Balisacan nga nakaguwa sila sa elevator paagi sa gamay nga buho kag nakahingabot ini sa pagtambong sa signing event. Pahayag pa sini, indi niya ini malipatan bangud amo ini ang pinakalawig nga elevator ride sa iya bug-os nga kabuhi nga naglawig sang isa ka oras kag 40-minutos.
Mismo ang tiglikom ang nag-post sang mga laragway kaangot sa ila nga sitwasyon kag kun paano sila nakaguwa halin sa 19th floor. May yara pa sang laragway nga nagatindog si Balisacan, nagasuksok sang iya nga barong Tagalog, samtang nagapungko naman ang iya staff sa salog.
Pag-abot sa venue, ginpalakpakan sang mga tawo ang tiglikom bangud nakahibalo na sila sang amo nga insidente — butang nga ginlahog na lang ni Balisacan sa iya nga speech.#
