Ginaduso sang isa ka House leader nga dapat manabat gid ang mga opisyal sang Philippine Coast Guard (PCG) nga amo ang mapamatud-an nga yara sa likod sang recruitment sang Chinese nationals bilang auxiliary members.
Ginpahayag ini ni House Deputy Majority Leader kag Tingog Party-list Rep. Jude Acidre matapos nabalahuba sa hearing sang House committee on transportation nga may 36 ka Chinese nationals nga na-recruit bilang parte sang PCG Auxiliary apang nakakas naman sila sa amo nga posisyon sang Disyembre 2023 bangud sa kakulang sang national security clearance.
Ini nga auxiliary amo ang voluntary uniformed organization nga may military structure nga attached sa PCG kun sa diin ang trabaho sini amo ang pagbulig sa ahensya nga ma-promote ang safety sa kadagatan.
Apang suno kay Acidre, isa ini ka seryoso nga pamahog sa national security kag indi man ini makonsiderar nga isa lamang ka honest mistake.
Dugang sini, makaalarma ini nga isyu nga bisan auxiliaries lamang sila, nagasuksok sila sang uniporme nga iya sang ahensya nga amo man ang departamento nga involved sa pagdampig sa West Philippine Sea batok sa pagpang-harass sang China.
Nagpanawagan man ang mamalidha sa PCG kag sa iban nga ahensya nga may kaangay nga auxiliary forces nga salaon man sang maayo ang ila nga recruits kag volunteers.#
