Nag-report ang head sang Federal Security Bureau kay Russian President Vladimir Putin nga naaresto na ang apat ka armado nga kalalakinhan nga amo ang ginatudlo nangamot sa pagpang-atake sa isa ka concert sa Crocus City Hall malapit sa Moscow kun sa diin masobra na sa 130 ang nagkalamatay.
Ginpahayag nga nadakop ang apat sa western border sang Russia sa Ukraine.
Pito ka iban pa ang nadetain kag ginapadayon naman ang pagpangita sa iban pa nila nga kahimbon.
Antes sini, nauna na ang Islamic State of Iraq and Syria ukon ang ISIS sa pag-ako nga sila nga responsable sa amo nga insidente kun sa diin nag-open fire ang armado nga kalalakinhan sa amo nga concert hall gamit ang automatic weapons kag sunod nga may ginhaboy nga granada kag bomba nga amo ang rason sang sunog sa complex nga rason man kun nagpanglakaak ang numero sang patay.
Sa latest nga data, nagdangat na sa 133 ang patay apang padayon ang pagpangita sang Russian authorities sa iban pa nga parte sang complex kun sa diin posible may natabunan nga mga lawas sang tawo.
May local governor man nga nagkumpirma nga 121 pa ang nagapabilin nga ginabulong sa ospital.
Gintawag naman ni President Putin nga isa ka “barbaric terrorist act” ang natabo nga gindungan pa sa concert sang isa ka Soviet-era rock band.
May na-mensyonar man ini nga pagkatapos sang krimen, nagpalagyo ang mga suspek pakadto sa Ukraine kun sa diin santo sa preliminary data, may napreparar na nga bintana sa Ukrainian side agud nga makatabok sila sa border.
Sunod man nga nagpanginwa ang Defense Intelligence sang Ukraine nga may kahilabtanan sila sa natabo sa concert hall. Gintawag man sini nga lunsay sala ang mga akusasyon ni Putin nga wala man sang napakita nga ebidensya.#
