Nagbalik na sa Pilipinas ang team sang National Bureau of Investigation (NBI) nga naghalin didto sa Timor Leste apang napaslawan ang mga ini mga madala-pauli si anay Negros Oriental congressman Arnolfo “Arnie” Teves, Jr.
Suno kay NBI Director Medardo De Lemos, gina-evaluate pa sang otoridad sa Timor Leste ang request sang International Criminal Police Organization (Interpol) kag ang request man sang pungsod para sa kustodiya sang pugante nga ex-congressman.
Ginpanginwala man ni De Lemos ang pahayag sang kampo ni Teves nga naggamit sila sang cellphone agud nga kuhaan sang laragway ang anay mamalidha samtang yara sa detention sa tuyo nga i-harass ini. Suno sa director, naghatag sang pahanugot si Timor-Leste President Jose Ramos-Horta nga magkuha sila sang documentation ukon ebidensya nga buhi si Teves.
Napaidalom ang anay kongresista sa kustodiya sang pulis sa Timor Leste kag magapabilin didto samtang pending ang iya nga deportation.
Ginapahayag 40 ka adlaw ang ginalawig sang deportation proceedings sa amo nga pungsod apang nagalaum ang Department of Justice nga mapadasig ang hulag sini bangud sa kaso sang natungdan.
Kun makaabot sa Pilipinas, magapangatubang si Teves sang kaso nga murder, frustrated murder, kag attempted murder bangud siya ang ginatudlo nga utok sa likod sang pagpatay kay anay Negros Oriental Governor Roel Degamo kag siyam ka iban pa sadtong Marso 2023.#
