Sa labing-una nga tion halin sang nagsugod ang gyera sa tunga sang Israel kag Hamas sa Gaza, napasar na gid man ang resolusyon sa United Nations Security Council nga nagapanawagan sang gilayon nga ceasefire.
Lakip man sa nakabutang sa resolution amo ang panawagan nga hilwayon na ang tanan nga mga bihag.
14 ka mga pungsod nga nagboto-pabor sa resolusyon, wala sang nagpamatok, samtang nag-abstain naman sang pagboto ang Estados Unidos sang Amerika nga amo ang pinakadaku nga kaalyado sang Israel.
Ini man ang labing-una nga tion nga may resolution nga ginduso ang bisan ano nga pungsod nga wala gin-veto sang Estados Unidos sang Amerika.
Sandig sa patakaran sang United Nations Security Council nga ginabug-usan sang 15 ka mga myembro, agud nga mapasar ang resolusyon, dapat nga makakuha ini sang at least siyam ka mga boto nga naga-pabor kag dapat nga indi ini pag-i-veto sang sin-o man sa lima ka mga permanent members nga amo ang United States, United Kingdom, France, Russia, kag China.
Ang nangin tikang sang Estados Unidos sang Amerika ang isa man ka daku nga kwestyon sa relasyon sini sa Israel samtang padayon ang opensiba sa Gaza.
Nagpagwa sang statement si Israeli Prime Minister Benjamin Netanyahu nga gin-abandonar sang Amerika ang nauna sini nga posisyon. Bangud sini, nagdesisyon ang prime minister nga ikanselar ang meetings sa tunga sang delegasyon sang Israel sa US officials sa Washington nga nakatalana kuntani subong na nga semana.
Antes sini nga tikang, wala tuo ang naga-akusar sa US nga ginagamit sini ang iya gahum agud nga pangapina ang Israel sa United Nations.
Apang nagsugod nga nangin kritikal ang US sa Israel sang nagtimbuok ang numero sang mga patay nga subong lampas na sa 32,000 kun sa diin kadam-an amo ang kababainhan kag mga kabataan.
Ginaduso man sang Amerika nga indi pagdayunon sang Israel ang opensiba sa Rafah nga nahamtang sa southern Gaza bangud tuman ka damo nga sibilyan ang madalahig pananglitan madayon ini.#
