Nagtipon ang national security sector sang Gabinete agud nga diskusyunan ang pinakaulihi nga pagpang-harass sang China sa resupply mission sang Pilipinas nga rason kun ngaa tatlo gid ka Navy personnel ang nasamaran kag naguba man pati ang resupply boat nga Unaizah May 4.
Suno sa Malacañang, ang nagpanguna sa meeting amo si Executive Secretary Lucas Bersamin.
Indi pa maathag subong kun ano ang mga naistoryahan sa amo nga pagtilipon apang ginahulat man ang mangin rekomendasyon sini kay President Ferdinand Marcos, Jr. nga natalana nga magbalik sa trabaho subong nga adlaw kasunod sang iya trangkaso bangud sa sunod-sunod nga byahe sa luwas sang pungsod.
Kahapon sang ginpatawag man sang Department of Foreign Affairs (DFA) ang chargé d’affaires sang Chinese Embassy kasunod sang paggamit sang China Coast Guard (CCG) sang water cannon agud atakehon ang resupply boat sang Pilipinas nga pakadto kuntani sa BRP Sierra Madre nga nahamtang sa Ayungin Shoal.
Sunod nga nag-istoryahanay sa telepono ang deputy foreign ministers sang duha ka nasyon agud hambalan ang insidente. Ini amo sanday Vice Foreign Minister Chen Xiaodong sang China kag si Foreign Affairs Acting Undersecretary for Bilateral Relations and ASEAN Affairs Ma. Theresa P. Lazaro nga amo naman ang halin sa Pilipinas.
Matandaan nga antes ang insidente sang weekend, ginbombahan man sang China sang water cannon ang amo man nga sakayan sang Pilipinas sang Marso 5 kun sa diin apat man ka Navy personnel ang nasamaran bangud sa nabuka nga kristal sa vessel.
Una naman ginpahayag sang Armed Forces of the Philippines (AFP) nga nagakaubos na ang mga barko sang Pilipinas nga mahimo magamit sa resupply mission sa Ayungin Shoal bangud sa ginahimo nga pagpangharass sang CCG partikular na ang ila paggamit sang water cannon.#
