Ginkumpirma sang Department of Foreign Affairs nga nahilway na ang 18 tanan nga Pinoy nga crew members sang oil tanker nga ginbanggaan anay kag ginsakop sang Iran samtang nagalayag ini sa Gulf of Oman sang Enero.
Suno sa ahensya, ginpahat-pahat ang pagpapauli sa mga Filipino nationals sa Pilipinas kun sa diin ang pinakaulihi amo ang anum nga nag-abot sa pungsod sang nagligad nga semana.
Gindugang pa sang ahensya nga nagapasalamat gid ang Pilipinas sa otoridad sang Iran sa paghangop amo man sa manning agency nga nagpatigayon agud nga mabuy-an ang crew members.
Ang involved nga barko, kun matandaan, amo ang Marshall Islands-flagged tanker nga St. Nikolas nga nagakarga sang krudo halin sa Iraq kag pakadto na kuntani sa Turkey sang nagligad nga Enero 11.
Ini man ang barko nga ginkumpiska anay sang Estados Unidos sang Amerika sang nagligad nga tuig bangud sang pagkarga sang langis pakadto sa Iran apisar sang sanctions nga ginapatuman sang amo nga tion.
Una naman nga nag-release sang pahayag ang Iran nga nagtimalos lamang sila sa “pagpangawat” nga ginhimo sang Amerika sa tanker sang 2023 nga ginhingadlan anay nga Suez Rajan.
Una naman nga ginpaathag ni DFA Undersecretary Eduardo De Vega nga para sa Iranian government, ang ila nga pagsakop sa amo nga oil tanker sang Enero ang makabig nga legal sandig sa ila nga layi.
Lakip pa sa ginatutukan sang Pilipinas subong amo ang paghingyo para mahilway man ang 17 ka mga Pinoy nga ginbihag man sang Houthis (naka-base sa Yemen kag suportado sang Iran) matapos nga gin-hijack man ang ila nga barko sa Red Sea sang Nobyembre sang nagligad nga tuig.#
