Mismo sanday Defense Secretary Gilberto Teodoro Jr. kag ang counterpart sini sa Estados Unidos sang Amerika nga si Defense Secretary Lloyd Austin ang nag-istoryahanay kaangot sa pinakaulihi nga pagpang-harass sang China sa West Philippine Sea.
Natabo ini kahapon ukon isa ka semana antes ginbalabagan kag ginbombahan liwat sang China Coast Guard sang water cannon ang sakayan sang Pilipinas nga padulong sa BRP Sierra Madre sa Ayungin Shoal.
Suno sa US Embassy in Manila, ginpaagi sa telepono ang diskusyon sang duha kun sa diin ginpasalig liwat ni Austin ang mapag-on nga commitment sang Estados Unidos sang Amerika sa pagdepensa sa soberanya kag hurisdiksyon sang Pilipinas.
Liwat man sini nga ginbukad ang US-Philippines Mutual Defense Treaty ang duha ka nasyon kun sa diin na-cover ang pwersa militar, public vessels, aircraft, Coast Guard sang duha ka pungsod sa Pacific lakip na mismo sa West Philippine Sea kun sa diin nagapang-bomba sang water cannon ang China.
Pareho man sa nauna na nga ginpaathag nanday Foreign Affairs Secretary Enrique Manalo, ginpapanindugan man sang duha ka defense chiefs nga final kag binding ang 2016 Tribunal Ruling nga nagapabor sa Pilipinas kag nagabasura sa claim sang China.
Sang nagligad nga Marso 23 sang liwat nga nag-atake ang China Coast Guard sa resupply mission sang Pilipinas kun sa diin liwat ini naggamit sang water cannon nga rason kun ngaa naguba ang sakayan sang Pilipinas kag napilasan pa ang tatlo ka Navy personnel.
