Nagbisita si Pope Francis sa isa ka presuhan sa Roma para sa Holy Thursday Mass amo man para sa paghugas kag paghalok sa tiil sang 12 ka mga preso kaangay sang ginhimo ni Hesus sa iya mga apostoles sa gab-i antes sang Iya kamatayon.
Talalupangdon man nga ginhimo ini sang 87-anyos nga Santo Papa sa lunsay lamang babaye nga mga inmates.
Ginpatigayon ni Pope Francis ang amo nga tuigan nga tradisyon samtang nga nagasakay ini sa iya nga wheelchair, nagayuhom, kag maayo ang kondisyon sang lawas.
Nakit-an man sa video sang Vatican ang kababainhan nga emosyonal samtang naga-atubang sa Santo Papa.
Halin sang nangin Santo Papa si Pope Francis, ginhimo niya ini nga seremonya sa guwa sang teritoryo sang Vatican kag ang iya ginpanghugasan sang tiil amo ang mga preso, refugees kag mga tawo nga may kasablagan sa lawas.
Pila ka tuig naman nga nahugasan sini ang tiil sang mga babaye kag Muslim, apang ini ang labing-una nga tion nga lunsay babaye ang ginpili para sa amo nga foot-washing ceremony.
Ang iya ginkadtuan nga Casa Circondariale Femminile di Rebibbia ang nahamtang siyam ka milya ang kalayuon halin sa Vatican City. Una ini nga nagserbe bilang detention center para sa mga menor de edad sang 1950s kag ginpadalagan sang Vincentian nuns antes ini gintugyan sa penitentiary supervisors sang 1979.#
