Nagpahanumdom ang Philippine National Police (PNP) nga mag-doble halong gid sa mga kaladtuan nga mga dagat kag suba subong nga Semana Santa ilabi na bangud sa na-rekord na nga insidente sang pagkalumos.
Sang Myerkules Santo, isa ang na-rekord nga patay matapos nalumos sa Panabo City, Davao del Norte. Magluwas diri, may duha man ka solterito nga missing kag ginapatihan nga nalumos man sa Cagayan River sa Barangay Natappian East sa Solana, Cagayan.
Sandig pa sa rekord sang otoridad, nagsaka na sa 212 ang numero sang mga indibidwal nga nalumos sa mga dagat kag suba sa bilog nga pungsod halin sang Enero – Marso subong nga tuig,
Ang pinakamataas nga numero sang mga may napatay amo ang Western Visayas nga may 28, ginasundan sang Calabarzon nga may 27, kag ang Central Luzon nga may 20.
Agud malikawan ang kaangay nga mga insidente, nagmandu man ang Department of the Interior and Local Government (DILG) sa ordered local government units (LGUs) nga pasangkadon pa ang ila nga personnel deployment.
Lakip man diri ang pag-activate sa peace and order councils kag local risk reduction and management councils.
Una naman nga ginpahayag ni PNP chief Gen. Benjamin Acorda Jr. nga 7,000 police officers ang na-deploy sa tourist areas kaangay sang resorts kag mga suba agud nga ma-monitor ang deployment sang lifeguards kag mapabilin ang public safety.#
