Ginkontra ni Senator Imee Marcos ang gintukod sang iya utod nga si President Ferdinand Marcos, Jr. nga National Maritime Council (NMC).
Suno sa senadora nga amo ang chairperson sang Senate Committee on Foreign Relations, ang pagtukod sini ang nagagiya sa Pilipinas sa delikado nga banas kag ang paghatag sang otoridad sa council nga magbaton sang bulig halin sa iban nga mga pungsod ang mahimo makatuga man sang gamo sa West Philippine Sea.
Ang NMC ang bag-o lamang natukod paagi sa Executive Order 57 ni President nga may titulo nga “Strengthening the Philippines’ Maritime Security and Maritime Domain Awareness” nga gin-isyu man matapos nga nagpaandam siya nga may countermeasures ang Pilipinas kasunod sang pagpang-atake sang China sa West Philippine Sea.
May otoridad man ang council nga magbaton sang donasyon, kontribusyon, grants, kag regalo halin sa domestic kag foreign sources sa tuyo nga naangot sa ila mandato kag functions.
Para naman sa senadora, bangud sa ginhimo sang Pilipinas, nagapakita ini nga mas nagpangibabaw ang emosyon ipaanggid sa rason sa maritime conflict sa China.
“Emotion rather than reason has prevailed in our maritime conflict with China and is leading us down a dangerous path that will cost us more than just Filipino pride,” pahayag sang presidential sister.
“Our country’s defense posture is far from self-reliant and the urge to retaliate soonest is about to pay the price of foreign interference. Section 7 of the newly signed Executive Order 57 welcomes many a Trojan horse of foreign interference through donations, contributions, grants, bequests or gifts from domestic and foreign sources that the National Maritime Center has been authorized to accept,” dugang sini.
Pahayag pa sang senadora, ang pagbaton sang defense kag maritime security donations ang mahimo lamang mag-gatong sa away, kaangay sang natabo sa Ukraine kag Gaza.
Ginpahayag man sini nga ang dapat himuon sang Pilipinas amo nga magpangita sang solusyon para sa kalinong kag mangayo sang bulig halin sa iban nga naga-claim man nga kaalyado sang nasyon.
Antes gin-isyu ni President Marcos ang Executive Order 57, una na nga ginpahayag ni former presidential spokesman Harry Roque nga ang Marcos administration ang balasulon sa agresibo nga aktwasyon sang China sa West Philippine Sea ilabi na sa Ayungin Shoal.
Ini bangud suno kay Roque, wala ginrespeto sang Marcos administration ang “gentleman’s agreement” ni anay Presidente Rodrigo Duterte kag Chinese President Xi Jinping. Ang amo nga verbal agreement ang gina-alegar nagsaad nga wala dapat sang improvements nga himuon ang Pilipinas sa BRP Sierra Madre nga yara sa Ayungin Shoal.
Ini nga claim ni Roque ang ginbali naman ni Atty. Salvador Panelo nga amo ang chief presidential legal counsel ni Duterte. #
