Ginapaimbestigaran sa Senado ang gina-alegar nga kasugtanan nga ginhimo ni anay Presidente Rodrigo Duterte sa China kaangot sa isyu sa West Philippine Sea.
Si Senator Risa Hontiveros ang nagduso sang Senate Resolution No. 982 kun sa diin nakasaad nga pananglitan matuod ang amo nga kasugtanan ni Duterte sa China, isa ini ka sahi sang “pagtraidor” bangud kaangay nga ginsungka sini ang soberanya kag teritoryo sang Pilipinas.
Ginsiling pa sang senadora nga ginapalibutan na sang China ang Pilipinas– halimbawa… sa telecommunications, national grid, kag kadagatan — kag kun matuod ang agreement, mas ginpabaskog pa sang anay presidente ang claim sang amo nga pungsod.
Matandaan nga ang anay spokesperson ni Duterte nga si Atty. Harry Roque ang nagbuyagyag nga may “verbal agreement” si Duterte sa China kun sa diin nakasaad nga tubig kag pagkaon lamang ang mahimo madul-ong sang Pilipinas sa barko nga BRP Sierra Madre nga amo ang nagabantay sa Ayungin Shoal.
Gina-alegar nga nakabutang sa kasugtanan nga indi pwede magdul-ong ang Pilipinas sang materyales para nga kay-uhon ang amo nga barko nga naka-standby na sa Ayungin halin pa sang 1999.
Ini nga pahayag ni Roque ang ginsumpakil naman ni anay presidential adviser Salvador Panelo nga nagpanindugan naman nga wala sang deal si Duterte sa China nga naangot sa West Philippine Sea.
Wala sang personal nga statement nga nabuy-an si Duterte kaangot sa amo nga isyu. #
