Ilisipon na lang ang nabilin nga malipayon nga adlaw ni Pastor Apollo Quiboloy.
Ini suno kay opposition senator Risa Hontiveros nga amo ang chairperson sa Senate committee on women, children, family relations, and gender equality matapos nga na-isyu na ang warrant of arrest batok sa nasambit nga Kingdom of Jesus Christ (KJC) founder kag lima ka iban pa.
Ini nga warrant ang ginpaguwa sang Davao Regional Trial Court bangud sa kaso nga sexual abuse.
Ginsiling ni Hontiveros nga halos tanan nga institusyon sa pungsod ang nagahulag na agud nga mapasabat si Quiboloy sa mga akusasyon sa iya.
Pananglitan madakpan na ini suno sa senadora, paatubangon man ini sa komitiba sa Senado.
Nagpanawagan man si Hontiveros kay Quiboloy nga indi na mag-inarte bangud indi man kinahanglan nga magpanago kun matuod nga wala ini sang sala nga nahimo.
Antes napaguwa ang warrant, nakadagdag man ang Senado sang separado nga arrest order batok kay Quiboloy bangud wala ini nagasipot sa committee inquiry sa gina-alegar mga krimen nga iya nahimo kaangay sang systematic trafficking, sexual abuse, forced labor, kag iban pa nga human rights violations.
Sa pihak nga bahin, ang Philippine National Police ang nagpahayag nga handa ini nga mag-trabaho kaupod sa iban nga law enforcement agencies agud nga maaresto ang sect leader nga kilala man bilang self-proclaimed “Appointed Son of God”.#
