Ginpabakod pa sang Korte Suprema paagi sa en banc decision ang amnestiya nga ginhatag kay anay senador Antonio Trillanes IV.
Kadungan sini nga desisyon, gindeklarar man nga “unconstitutional” ang proklamasyon ni anay Presidente Rodrigo Duterte para ibasura ang amo nga amnestiya.
Suno sa Supreme Court paagi kay Associate Justice Maria Filomena Singh, indi ma-revoke sang isa ka presidente ang gin-grant nga amnestiya kun wala sang concurrence halin sa Kongreso.
Ginsaad pa sang Korte Suprema ang pagpangibabaw sang Bill of Rights kag ginsiling nga indi makapangibabaw sa layi ang gobyerno ukon sin-o man sa mga opisyal sini.
Suno pa sa mga mahistrado, ang pagbasura sa amnestiya ni Trillanes nga madugay na nga naaprubahan kag wala sang bastante nga abiso ang makabig nga paglapas sa iya nga “constitutional right to due process.”
Ginpahayag man nga ang Proclamation No. 527 ni Duterte ang nagalapas sa “ex post facto law” kag “double jeopardy” bangud gusto sini nga buhion ang mga kaso-kriminal batok kay Trillanes nga madugay na nga nabasura kag nadagdagan na sang pinal nga desisyon.
Nakit-an man sang mga mahistrado ang “convincing evidence” nga nagpasa si Trillanes sang iya nga aplikasyon para mahatagan sang amnestiya.
Isa anay ka soldado si Trillanes nga nagpasakop sa 2003 Oakwood mutiny kag sa 2007 Manila Peninsula siege. Sang tion ni anay President Benigno Aquino III sang 2011, nahatagan siya sang amnestiya sa ginpangatubang sini nga kaso sa sedition.#
