ILOILO CITY- Agaw-atensyon ang canvassing para sa Mister and Miss Sinapsapan Elementary School sa Jordan, Guimaras matapos nagdangat sa minilyon ang natipon nga kwarta.
Sa interview sang Bombo Radyo kay Dr. Maelou Pugaja, head teacher IV sang nasambit nga eskwelahan, iya ginpahayag nga nagdangat sa masobra P2 million ang kwarta nga natipon para sa last canvassing.
Suno kay Pugaja, sang tuig 2023, nagdangat lang sa P1.8 million ang kabug-usan nga kwarta nga ila natipon sa diin ang Grade 4 amo ang nagdaog.
Apang subong nga tuig, ang Grade 2 ang nagdaog sa canvassing matapos naghatag sang P1.029 million; may yara sang P304,000 ang 1st runner-up; may P244,000 ang 2nd runner-up; may P232,000 ang 3rd runner-up; may P174,000 ang 4th runner-up; may P135,000 ang 5th runner-up; kag P130,000 ang iya sang 6th runner-up.
Wala naman sila nagdumdom nga bilang isa ka barangay elementary school, makatipon sila sang amo kadako nga kwarta.
Gin-athag man sini nga ang 10% sang ginhatag nga kwarta sa canvassing ang ibalik sa ginikanan kag 90% naman ang makadto sa proyekto sa eskwelahan.
Ang canvassing ang ginsaksihan sang faculty, board of directors kag mga barangay officials.
Plano naman nga ipain ang nasambit nga kwarta para sa emergency gate sang eskwelahan.
