Ginpanginwala ni anay Armed Forces of the Philippines (AFP) chief kag subong National Security Adviser Eduardo Año nga may “gentleman’s agreement” sa tunga ni anay President Rodrigo Duterte kag Chinese President Xi Jinping kaangot sa West Philippine Sea.
Si Año amo ang AFP chief halin sang 2016-2017 sa idalom sang Duterte administration kag kasunod sang iya retirement, gin-appoint siya bilang tiglikom sang Department of the Interior and Local Government tubtub nga nagtakop ang termino ni Duterte.
Suno kay Año, masami nga may ginasiling ang China nga may kasugtanan sila sang Pilipinas apang wala man sang mapakita nga ebidensya kag wala man sang gina-identify kun sin-o nga tawo sa Pilipinas ang nagsulod sa ila ginatumod nga agreement.
Gindugang pa ni Año nga magapadayon ang Pilipinas sa pagbato para sa kinamatarong, teritoryo, kag soberanya sa sulod sang exclusive economic zone sang pungsod.
Ang ginatumod nga agreement amo ang ginbuyagyag sang anay spokesperson ni Duterte nga si Atty. Harry Roque nga may “verbal agreement” si Duterte sa China kun sa diin nakasaad nga tubig kag pagkaon lamang ang mahimo madul-ong sang Pilipinas sa barko nga BRP Sierra Madre nga amo ang nagabantay sa Ayungin Shoal.
Gina-alegar nga nakabutang sa kasugtanan nga indi pwede magdul-ong ang Pilipinas sang materyales para nga kay-uhon ang amo nga barko nga naka-standby na sa Ayungin halin pa sang 1999.
Ini nga pahayag ni Roque ang ginsumpakil naman ni anay presidential adviser Salvador Panelo nga nagpanindugan naman nga wala sang deal si Duterte sa China nga naangot sa West Philippine Sea.#
