Ginklaro sang National Security Council (NSC) nga apisar sang padayon nga pagpang-harass sag China sa mga sakayan sang Pilipinas sa West Philippine Sea, magapadayon ang pungsod sa resupply mission sa Ayungin Shoal nga wala na nagapangayo sang bulig sa iban nga nasyon.
Suno kay NSC Assistant Director General Jonathan Malaya, sakayan sang Pilipinas ang gamiton bangud exclusive economic zone man ini sang pungsod kag indi iya sang iban.
Gin-isyu ni Malaya ang ini nga statement samtang nga ginapreparahan ang trilateral meeting ni President Ferdinand Marcos, Jr. sa Washington sa masunod nga semana kaupod si US President Joe Biden kag Japanese Prime Minister Fumio Kishida.
Suno pa sa opisyal, ginahanda na sang gobyerno ang pila ka adjustments sa resupply missions sa BRP Sierra Madre sa Ayungin Shoal apang wala na gindetalye kun ano ini nga mga pagbag-o.
Antes sini, may mga suhestyon nga mag-untat na sa paggamit sang wooden vessels bangud madali ini maguba kun maggamit sang water cannons ang China Coast Guard (CCG).
Una naman nga may nagaguluwa nga indi kumpirmado nga reports nga nagtanyag ang US nga magpadala sang barko agud mag-escort sa resupply missions sang Philippine Coast Guard kag Philippine Navy sa Ayungin.#
