Natalana na subong nga Domingo, Abril 7, ang labing-una nga joint naval exercises sang Pilipinas, Australia, Japan, kag Estados Unidos sang Amerika sa sulod sang exclusive economic zone (EEZ) sang Pilipinas.
Nakasaad sa joint statement sang defense chiefs sang apat ka magkaalyado nga pungsod nga ini nga Maritime Cooperative Activity ang nagatuyo nga proteksyunan ang rule of law nga amo ang pundasyon sang malinong nga Indo-Pacific region kag matib-ong ang kahilwayan sa paglayag kag overflight.
Wala na-mensyonar ang pangalan sang China sa sini nga statement, apang ginsulit sang apat ka pungsod ang pag-butang sa 2016 international arbitration ruling.
Ini nga final kag legally binding nga ruling sa The Hague amo ang naga-imbalido sang masangkad nga teritoryo nga gina-claim sang China sa exclusive economic zone sang Pilipinas.
Suno kay Department of National Defense (DND) spokesperson Arsenio Andolong, ini nga aktibidad sa West Philippine Sea ang magalakip sang communication exercise, division tactics ukon ang possible officer of the watch maneuver, kag photo exercise.
Lima man ka mga barko ang ipadala sa sini nga exercise lakip ang BRP Gregorio del Pilar kag BRP Ramon Alcaraz halin sa Pilipinas; USS mobile halin sa United States; HMAS Warramunga halin sa Australia; kag ang DD Akebono halin sa Japan.
Sa separado nga statement halin sa embahada sang Japan sa Manila, ginsiling nga ang “anti-submarine warfare training” ang nalakip sa tactical trainings para sa sini nga aktibidad sa sulod sang isa ka adlaw.#
