Nagpaandam ang militar sa mga aktibo sini nga mga personnel nga indi gid mag-sign up sa mga kumpaniya sang China nga nagapang-recruit sang analysts.
Ini kasunod sang report sang Department of Information and Communications Technology sang nagligad nga semana nga may mga kumpaniya ang China nga nagapakuno-kuno nga naka-base sa Estados Unidos sang Amerika kag sa Europa kag nagapang-recruit sang retirado kag aktibo nga mga military personnel para makasulod sa part-time jobs.
Suno kay Col. Francel Margareth Padilla, spokesperson sang Armed Forces of the Philippines, wala pa sang aktwal nga report nga may personnel sila nga involved bangud ang nakit-an sa comment section ang natumod nga wala na sa serbisyo.
Nagpasalig man si Padilla nga kada adlaw, ginapahanumdom gid sa tropa halin sa ibabaw tubtub sa pinakamanubo nga unit sang militar nga mag-andam sa sini nga mga taktika sang China.
Ini nga online recruitment ang ginpahayag nga nagsugod halin pa sang Disyembre 2023.
Una na nga ginpahayag sang DICT nga ini nga mga Chinese companies ang nagatanyag sang dolyares kada oras bilang bayad sa ila ma-recruit nga online analysts.
Matapos ang koordinasyon sa Department of National Defense kag sa intelligence sector, pakig-angutan man sang DICT ang mga kumpaniya sa China nga involved sa amo nga operasyon.#
