ILOILO CITY- Ginaselebrar subong nga adlaw sang mga Muslim ang Eid’l Fitr — ang kapiestahan nga nagatapos sang isa ka bulan nga pagpuasa ukon ang Ramadan nga nagsugod sang Marso 12.
Ginhimo ni Bangsamoro Mufti Sheikh Abdulrauf Guialani ang anunsyo sang Abril 9 matapos ang ginpatigayon ang moonsighting sa mga designated areas sa palibot sang pungsod.
Una na nga gindeklarar sang Malacañang ang Abril 10 bilang holiday para sa pag-obserbar sang Eid’l Fitr.
Ang sighting sang mooncrescent ang tuman ka importante sa pagtumod sang Eid’l Fitr bangud nagamarka ini sang pagsugod sang bag-o nga lunar month sang Shawwal, ang ikanapulo ng bulan sang Islamic lunar calendar.
Ang Eid’l Fitr, nga tradisyonal nga ginaselebrar sa sulod sang tatlo ka adlaw, ang isa ka selebrasyon para sa mga Muslim sa bilog nga pungsod.
Ang mga Muslims nagasugod sang selebrasyon paagi sa pangamuyo sa mosque sa kaagahon.
Ang okasyon nagamarka man sang pagtililipon sang pamilya kag abyan, amo man ang pagpaambitanay sang pagkaon kag pagbayluhanay sang regalo.
