ILOILO CITY- Nagsaka pa sa 31 ang mga probinsiya nga apektado sang drought, base sa data sang Philippine Atmospheric, Geophysical and Astronomical Services Administration (PAGASA).
Sa sini nga mga probinsya nga apektado sang drought, 19 ang yara sa Luzon.
Ini amo ang Abra, Apayao, Benguet, Cagayan, Cavite, Ifugao, Ilocos Norte, Ilocos Sur, Isabela, Kalinga, La Union, Mountain Province, Nueva Ecija, Nueva Vizcaya, Occidental Mindoro, Oriental Mindoro, Palawan kag Rizal.
Nalakip man sa listahan ang Metro Manila.
Sa Visayas, ini ang Antique, Biliran, Bohol, Cebu, Eastern Samar, Guimaras, Iloilo, Leyte, Negros Occidental, Negros Oriental kag Samar.
Sa Mindanao, ang Lanao del Norte lamang ang isahahon nga nagaeksperyensiya sang drought.
Ang drought nagakatabo kun may yara sang below normal nga ulan ukon 21 tubtob 60 percent nga buhin gikan sa average sa sulod sang lima ka bulan ukon mas manubo pa gid sa normal rainfall sa sulod sang tatlo ka bulan nga sunod-sunod.
Samtang, apektado naman sang dry spell ang Batangas, Laguna kag Masbate.
Ang Capiz, Siquijor kag Southern Leyte sa Visayas kag Camiguin, Misamis Occidental, Misamis Oriental, Tawi-Tawi, Zamboanga del Norte, Zamboanga del Sur kag Zamboanga Sibugay sa Mindanao ang nagaeksperyensiya sang dry spell.
Yara naman sa 15 ka mga probinsiya – siyam sa Luzon, duha sa Visayas kag apat sa Mindanao – ang nagaeksperyensiya sang dry conditions.
Ang dry spell nagakahulugan sang below normal rainfall sa sulod sang tatlo ka bulan samtang ang dry conditions naman amo ang below normal rainfall sa sulod sang duha ka bulan.
Suno pa sa state weather bureau, ang El Nino mahimo maglawig tubtob sa Mayo.
