Ginbilin sanday Vice President Sara Duterte, Executive Secretary Lucas Bersamin kag Agrarian Reform Secretary Conrado Estrella III bilang caretakers sa Pilipinas samtang nagatambong si President Ferdinand Marcos Jr. sa trilateral summit sa Washington kaupod kanday US President Joe Biden kag Japanese Prime Minister Fumio Kishida.
Suno sa Presidential Communications Office, si VP Duterte ang chair samtang si Bersamin naman kag si Estrella ang iya mga assistant.
Ang tatlo ka mga opisyal amo man ang caretakers sang pungsod sang nagbiya si Marcos agud nga magtambong sa 42nd Association of Southeast Asian Nations Summit sa Indonesia sang Mayo sang nagligad nga tuig.
Sa iban pa nga byahe sang presidente sa luwas sang pungsod, ang bise-presidente lang ang isahanon nga ginbilin bilang caretaker.
Sa iya departure message kahapon, ginsiling ni Marcos nga ang iya meeting kay Biden kag Kishida ang magatib-ong pa sang trilateral cooperation sang tatlo ka mga nasyon.
Sa sidelines sang trilateral summit, may bilateral meeting man ang presidente kag si Biden kun sa diin diskusyunan kun paano pa mapauswag ang alyansa sang duha ka pungsod.
Mangaluyag man si Marcos sa business leaders sa US kag imbitaron sila nga mag-invest sa Pilipinas.#
