ILOILO CITY- Nanindugan ang pamilya sang ginpatay nga tricycle driver sa Boulevard, Molo nga wala na ini sang involvement sa iligal nga druga humalin sang nakagwa ini sa presuhan.
Ang biktima amo si Zaldimer Helliga, 47-anyos, residente sang amo nga lugar kag nakaagi na nga napreso sang 2016 bangud sa kaso nga paglapas sa Republic Act 9165 ukon Comprehensive Dangerous Drugs Act of 2002 apang nakagwa paagi sa plea bargaining agreement.
(GRACE)
Sa interview sang Bombo Radyo kay Grace Helliga, anak sang biktima, iya ginpahayag nga ang pagbyahe na gid lang sang tricycle ang ginakasakuan sang iya amay.
Suno sa iya, sa pagkamatuod, ginhingyo gid sang amay niya nga makuhaan siya sang tricycle para makabyahe kag makabulig sa pagbakal sang kinahanglanon sang iya pamilya.
Nagapangabay naman ini sa suspek nga si Gerardo Tayco Sofia Jr., alyas “Bulldog”, nga residente man sang nasambit nga barangay nga makonsensiya kag magsungka na lang.
