ILOILO CITY- Ginakabig sang chairman sang Committee on Engineering and Public Works sa City Council nga pagbastos sa syudad ang ginhimo sang District Engineering Office sang Department of Public Works and Highways nga pagpatindog sang multi- purpose building sa San Isidro, La Paz, Iloilo City apisar nga wala sang building permit.
Sa interview sang Bombo Radyo kay Councilor Johnny Young, iya ginpahayag nga nagpadala sang endorsement letter ang District Engineering Office nga naga- request nga hatagan sang city council sang authority si Mayor Jerry Treñas nga magpirma sang building permit.
Suno kay Young, sa pagpangusisa sang kumitiba kag sa confirmation man ni Engineer Mavi Gustilo sang Office of the Building Official, natukiban nga sang December 2023 pa natapos ang nasambit nga multi purpose building.
Pahayag ni Young, bangud wala nag-agi sa husto nga proseso, makabig nga kwestiyonable ang amo nga proyekto ilabi ni ang integridad sang struktura.
Natalana naman nga ipatawag sang konsehal sa committee hearing sa Abril 18 ang mga concerned parties agud mapangayuan sang paathag kun ngaa wala sila nag-secure sang building permit antes ang construction.
Nahibaluan nga ang contractor sang proyekto amo ang Golden Heaven Builders and Construction Supply kag may project cost nga P4.9 million.
Nagsugod ang construction sang Mayo 12,2023 kag ang completion date amo ang August 23, 2023 base sa project billboard.
