Nagsapol ang foreign affairs secretary kag minister sang Pilipinas kag Japan antes ang trilateral summit sa Washington sa Amerika.
Natabo ang bilateral meeting sa tunga nanday Foreign Affairs Secretary Enrique Manalo kag Japan Minister of Foreign Affairs Kamikawa Yoko agud nga pabaskugon pa ang kooperasyon sang duha ka pungsod.
Ila man gindumdom ang normalisasyon sang diplomatic relations sa tunga sang Pilipinas kag Japan nga maga-70 ka tuig na sa 2026.
Magluwas sa foreign ministers, sanday President Ferdinand “Bongbong” Marcos Jr. kag Japanese Prime Minister Fumio Kishida ang yara man sa Washington para sa trilateral leaders summit kaupod kay US President Joe Biden.
Matabo ang meeting sa Huwebes sang hapon oras sa Washington ukon Byernes sang aga oras sa Pilipinas.
Sa latest data halin sa Philippine Statistics Authority, ang United States ang pinakadaku nga recipient sang Philippine exports sang Pebrero samtang pangaduha naman ang Japan.
Sa imports, ikaduha naman sa pinakadaku ang Japan sa supplier sang imported goods sa Pilipinas samtang nagapang-anum naman ang Amerika.
