Gindagdagan sang silot nga kamatayon ang isa ka real estate tycoon sa Vietnam bangud sa iya papel sa $12.5-billion ukon P705.77-billlion nga kaso sang financial fraud sa amo nga pungsod.
Ini nga kantidad ang halos tres porsyento sang gross domestic product sang Vietnam sang 2022.
Ini nga tycoon amo si Truong My Lan, 67-anyos nga chair sang real estate company nga Van Thinh Phat Holdings Group.
Nagsugod ang trial sa iya sang Marso 5 kag ginpapanaogan sang korte sang desisyon nga guilty sa embezzlement, bribery kag violations sang banking rules.
Ang masobra 80 ka iban pa nga defendants sa kaso ang gindagdagan naman sang sentensya halin sa probation tubtub sa tag-tatlo ka tuig nga pagkapreso.
Indi pa maathag subong kun ano ang appeal ni Lan sa desisyon sang korte.
Siya kag ang iya mga kakuntyaba ang gin-akusaran nga nagbulsa sang masobra 304 trillion dong ukon P686.87-billion halin sa Saigon Joint Stock Commercial Bank (SCB) nga iya epektibo nga nakontrol paagi sa iya madamo nga proxies.
Iligal man nga ginkontrol sini ang bangko halin sang 2012-2022 kun sa diin ginpasugtan ang 2,500 ka loans nga nagresulta sa pagkapierde sang tubtub sa $27 billion ukon P1.5-trillion.
Nahibaluan nga ang graft crackdown subong sa Vietnam nga ginatawag nga “Blazing Furnace” amo ang rason sang pagkadakop kag pagpanaog sa pwesto sang madamo nga senior state officials kag high-profile business executives.
