Wala nalingkang ang China kag indi maglain ang ila panindugan sa West Philippine Sea apisar pa nga gamiton sang Pilipinas ang Mutual Defense Treaty sini sa Estados Unidos sang Amerika.
Ginklaro ini sang Chinese Embassy sa Manila paagi sa isa ka statement nga ginpaguwa kahapon, Abril 12.
Ini kasunod sang ginbuy-an nga statement ni US President Joe Biden sa trilateral summit sa Washington kun sa diin ginpasalig sini nga mahimo magamit ang treaty kun may matabo nga pagpang-atake sa barko, aircraft, ukon pwersa-militar sang Pilipinas sa West Philippine Sea.
Ini nga treaty nga ginpirmahan sang Pilipinas kag Amerika sang 1951 ang isa ka defense pact nga nagasaad nga mahimo makabuligay ang duha ka nasyon sa depensa kun may mga pagpang-atake nga matabo.
Sa idalom sang Article IV, nakasaad nga ginakabig sang Pilipinas kag US ang anuman nga armado nga pagpang-atake sa Pacific area sa bisan sin-o sa ila nga delikado na para sa kalinong kag safety sang nasyon.
Sa idalom sang Article V, natumod man nga covered sang treaty ang armado nga pagpang-atake sa metropolitan territory sang Pilipinas man ukon Amerika, ukon ang island territories sa idalom sang ila hurisdiksyon sa Pacific Ocean, ukon ang pagpang-atake sa armed forces, public vessels, ukon aircraft sa Pacific.
Sabat naman sang China, ang Amerika ang indi partido sa isyu sa West Philippine Sea kag wala ini sa posisyon agud nga magpanghilabot sa isyu sa tunga sang China kag Pilipinas.
Suno pa sa embahada, indi man matabo ang tensyon sa West Philippine Sea kun wala gina-tulod sang US ang Pilipinas.
Determinado ang China suno sa embahada nga itib-ong ang ila nga soberanya kag ang maritime rights kag mga interes.
Ginpanindugan man sang China nga dapat nga kuhaon na sang Pilipinas ang daan nga warship ukon ang BRP Sierra Madre nga yara sa Ayungin Shoal.
Gin-athag man sini nga mapasugot sila nga madul-ong ang Pilipinas sang pagkaon kag iban pa nga nagapanguna nga kinahanglanon para sa tropa nga yara sa barko, apang indi pwede magdala sang construction materials agud kay-uhon ini ukon agud magpatindog sang permanente nga outpost. #
