Ginpatawag sang China ang diplomats sang Pilipinas kag Japan bangud wala sini naluyagan ang pila sa ginpanghambal sang mga lider sang duha ka nasyon sa trilateral summit sa Amerika.
Byernes sang aga (oras sa Pilipinas) sang nagkit-anay sanday US President Joe Biden, Japanese Prime Minister Fumio Kishida, kag President Ferdinand Marcos Jr. sa White House kun sa diin nalakip sa naistoryahan amo ang agresibo nga mga aktwasyon sang China sa West Philippine Sea.
Suno sa Chinese foreign ministry spokesperson nga si Mao Ning, hugot nila nga ginabali ang pahayag ni Kishida sa US Congress kun sa diin ginpangalanan sini ang China nga amo ang pinakadaku nga hangkat sa bilog nga kalibutan.
Pahayag pa ni Mao, wala man nagustuhan sang China ang “small-group politics” sang tatlo ka nasyon nga amo pa ang nagapasaka sang tensyon.
Bangud sini, ginsapol sang Chinese ministry official nga si Liu Jinsong ang Japanese embassy official nga si Akira Yokochi agud istoryahan ang amo nga pahayag ni Kishida nga negatibo sa pamatin-an sang Beijing.
Nagpakigkita man si Liu kay Philippine ambassador to China Jaime FlorCruz.
Si Florcruz ang ginpatawag man sang ministry bangud sa gin-alegar nga negatibo man nga mga tinaga ni Marcos nga naangot sa China sang ginpatigayon ang summit.
Sa amo nga trilateral summit sa US, ginpasalig ni Biden nga nagapabilin nga malig-on ang commitment sang Amerika para sa depensa sang Japan kag Pilipinas ilabi na sa separado nga away sa teritoryo sang duha ka nasyon batok sa China.#
