Pormal nga iga-deklarar ang state of calamity sa Iloilo bangud sa kakulangan sang tubig kun malab-ot na ang 15% nga requirement para sa calamity declaration.
Suno kay Iloilo City Mayor Jerry Treñas, kun may deklarasyon na nga mahimo, may igadul-ong nga tubig nga sarang mainom sa apektado nga mga lugar sa syudad.
Sa subong suno sa alkalde, ginahulat niya ang report sang Iloilo City Disaster Risk Reduction and Management Office kaangot sa water situation sa Iloilo City.
Base sa inisyal nga reports suno kay Treñas, nagkalahubas na ang manabaw nga mga bubon bangud sa El Niño phenomenon.
“Next week, I will wait for the report of CDRRMO on the water situation in the city. The initial reports show that many shallow wells have dried up. We will verify if we have already reached the 15% requirement for a calamity declaration, and if so, we will have the formal declaration and deliver potable water to the affected areas,” suno kay Treñas.
Una na nga ginpahayag sang City Disaster Risk Reduction and Management Office nga sa baylo nga mag-rekomendar sang state of calamity, igaduso sini ang intensified risk management sang malain nga epekto sang El Niño sa tubig.
Isa ka semana na ang nagligad matandaan nga gincite sang talatapan ang climate and disaster risk assessment nga ginpatigayon sang City Environment and Natural Resources Office (CENRO) sa 25 barangays nga apektado sang drought.#
