Ginmuno kag ginsaway sang pila ka mamalidha ang kaupod nila sa Kongreso nga si anay House Speaker kag subong Davao del Norte 1st District Rep. Pantaleon Alvarez bangud sa panawagan sini sa militar nga bawion ang ila suporta kay President Ferdinand R. Marcos Jr. agud nga mapilitan ini nga mag-resign.
Ginpanawagan ini ni Alvarez sang nag-upod siya kag naghambal sa isa ka rally sang die-hard supporters ni anay Presidente Rodrigo Duterte sa Tagum City sang Domingo sang gab-i.
Para kay Surigao del Sur 2nd District Rep. Johnny Pimentel, ang ginpanghambal ni Alvarez ang katumbas sang aktwasyon sang rebellion ukon sedition.
Nagpanawagan naman si Camiguin Rep. Jurdin Jesus Romualdo sa Department of Justice nga imbestigaran ang anay house speaker bangud sa iya “seditious statement” kag dapat man ini nga pasakaan sang kaso-kriminal.
May statement man si Lanao del Norte 1st District Rep. Khalid Dimaporo nga nagpanugyan kay Alvarez nga maghalong gid sa pagpili sa iya nga mga tinaga, bangud ang iya ulihi nga ginpanghambal ang makabig nga wala nagakabagay bilang katapo sang Kamara kag posible pa nga mapasakaan sang kaso kaangot sa ethics.
Nagpahayag naman si La Union 1st District Rep. Francisco Paolo Ortega nga buligan na lang ni Alvarez ang Kongreso kag indi na mag-uyang sang tiyempo para sa destabilisasyon sang administrasyon.
Sa statement sang DOJ, nakasaad nga ginatun-an na sini kun ikonsiderar ang request sang mamalidha nga maghulag ang ahensya kag maghimo sang official action batok kay Alvarez kag kun nakalab-ot sa lebel sang sedition ang ginpanghambal sini.#
