ILOILO CITY- Magapasakop sa pinakauna nga kahigayunan sa maragtas ang Philippine Coast Guard (PCG) sa 2024 Balikatan Exercise sa tunga sang Pilipinas kag Estados Unidos sang America.
Suno kay 2024 Balikatan Exercises Executive Agent Colonel Michael Logico,ang rason sang exercises amo nga ipakita ang kapabilidad sang pungsod kaupod ang Philippine Coast Guard kag sang mga kaalyado nga nasyon sa pagpangapin sang teritoryo.
Ang 2024 Balikatan, nga magasugod sa Abril 22 kag magatakop sa May 10, ang mangin pinakadako sa pila ka tuig na nga annual joint military exercise nga may partisipasyon sang pila ka ahensya sang gobyerno kag rmadong kusog sang mas madamo nga nasyon.
Ini ang igaobserbar sang pila ka pungsod kaangay sang Brunei, Canada, France, Germany, Great Britain, India, Indonesia, Japan, Malaysia, New Zealand, Republic of Korea, Singapore, Thailand, kag Vietnam.
Sa bahin sang Estados Unidos, maga- deploy ini sang F-22 air superiority stealth fighter jets, AC 130 aircraft, Apache attack helicopters, Blackhawks, kag posible F-35 fighter jets.
Ang Pilipinas naman ang magapadala sang BRP Antonio Luna.
Ginpahayag sang Armed Forces of the Philippines nga kapin 16,700 tropa ang magapartisipar sa exercise, dugangan pa sang personnel halin sa Australian Defense Force kag Marine Nationale (French Navy).
Ang 2024 Balikatan magasakop sang tatlo ka components: Command and Control Exercise (C2X), Field Training Exercise (FTX), kag Humanitarian Civic Assistance (HCA).
