ILOILO CITY- Gindulaan gid sang kabuhi ang duwa ka mga sakay sang isa ka pribado nga salakyan matapos mabunggo ini sa konkreto nga poste sang isa ka hardware shop sa Barangay Alacaygan, Banate, Iloilo.
Ang mga biktima amo sanday Alyas Rene, 22-anyos, naga-drive sang salakyan, kag Alyas Jun, 23-anyos, pasahero, kag lunsay mga residente sang Barangay Belen, Banate.
Sa interview sang Bombo Radyo kay Police Captain General Enrique Robles, hepe sang Banate Municipal Police Station, iya ginpahayag nga mga 10:44 sang gab-e may nabaton sila nga report nahanungod sa disgrasya kag gilayon man nila nga ginrespondehan.
Suno kay Robles, sa ila imbestigasyon, halin sa ilimnan ang duwa kag base man sa nakakita, medyo madasig ang dalagan sang salakyan kag posible nga nadulaan sang kontrol sa break ang driver.
Dugang sang natungdan, nakabunggo gid ang ila nasakyan sa konkreto nga poste sang isa ka hardware shop sa diin nagtabog gid paggwa sang salakyan ang sakay sa passenger’s seat.
Nakaagom ang mga ini sang mga patal nga pilas sa nagkalain- lain nga parte sang lawas nga gintunaan sang ila kamatayon.
