ILOILO CITY- Boluntaryo nga nag- surrender sa City Drug Enforcement Unit sang Iloilo City Police Office ang nakapalagyo nga main target sa drug buy-bust operation kahapon nga adlaw sa Zone 13, Barangay Calaparan, Arevalo, Iloilo.
Ini amo si Sandy Duremdes, 48 anyos kag residente sang amo nga lugar.
Sa exclusive interview sang Bombo Radyo kay Duremdes, iya ginpahayag nga wala ini nalagyo kahapon bangud yara lang siya sa balay sang iya abyan nga nagakatulog bangud nahubog ini.
Suno kay Duremdes, wala siya nakahibalo kung ano ang natabo kag nakibot na lamang siya sang ginpahibalo sa iya nga ginpangita ini sang otoridad kag subject ini sa drug buy-bust operation sang City Drug Enforcement Unit.
Ginpanginwala man ni Duremdes nga konektado siya kay Alyas Jay nga amo ang nadakpan sa amo man nga buy-bust operation.
Suno sa iya, masako siya sa pagbyahe sang e-bike kag apisar malapit lang ang balay ni Alyas Jay, wala man man sila nagaupdanay.
Dugang ni Duremdes, nag-surrender ini bangud luyag niya nga tinluan ang iya pangalan.
