ILOILO CITY- Nagsabat ang director sang Iloilo Police Provincial Office kasunod sang naggwa nga impormasyon nga i-relieve ini sa posisyon, epektibo bwas nga adlaw.
Sa interview sang Bombo Radyo kay PCol Ronaldo Palomo, iya ginpahayag nga wala siya sang nabaton nga ano man nga communication tuhoy sa pag-relieve sa iya.
Suno kay Palomo, indi normal sa organisasyon sang kapulisan nga i-relieve ang isa ka director nga wala sang rason.
Gintawag naman niya nga misinformation ang natabo.
Ginpahayag pa niya nga posible nga may mga tawo sa likod sini nga pagpalapta sang sala nga impormasyon nga luyag nga sipaon siya sa posisyon.
Ginatugyan na lang niya ini sa Regional Director sang Police Regional Office 6 nga amo gid ang makasabat kun i-relieve gid man ini ukon indi.
Nahibaluan nga duha ka tuig ang mangin termino ni Palomo sa Iloilo Police Provincial Office.
Pebrero 2023 sang nagsugod sa pagpungko si Palomo bilang director sang Iloilo Police Provincial Office kun sa diin si Governor Arthur Defensor Jr. mismo ang nagpili sa iya.
