ILOILO CITY- Tubtob subong, indi sa gihapon makapati ang isa ka former Bombo Volunteer Reporter nga isa ini sa mga nakapasar sa April 2024 Physician Licensure Examination.
Ini amo si Dr. Hilary Ruth Angela Baylon, tumandok sang Barangay Bulaqueña, Estancia, Iloilo kag nangin Bombo Volunteer Reporter sa The Vote 2013.
Apang indi kinaandan ang nangin sitwasyon ni Baylon bangud antes ini nagkuha sang medisina, nagkuha anay ini sang kurso nga Bachelor in Broadcasting sa West Visayas State University kag nagtapos sang tuig 2014.
Si Baylon ang nagkuha sang medisina sa Our Lady of Fatima University-College of Medicine.
Sa interview sang Bombo Radyo kay Baylon, iya ginpahayag isa gid sa naimpluwensya sa iya nga mangin isa ka doktor amo ang iya iloy nga isa ka Pediatrician.
Suno kay Baylon, sang nagkuha ini sang kurso nga Bachelor in Broadcasting, daw kaangay nga ginatawag siya sang tadhana agud mangin isa ka doktor.
Ginpatapos anay sini ang kolehiyo kag nagtrabaho sa isa ka pharmaceutical company sa sulod sang anom ka bulan.
Matapos sini, nagpadulong na ini sa Metro Manila agud sundon ang iya tadhana agud mangin isa ka doktor.
Nagamit man sini ang iya nangin eksperyensya bilang Bombo Volunteer Reporter sa medisina ilabi na sa pag-interview sang mga pasyente kag pagkuha sang first, fast and accurate nga mga impormasyon.
Nangin dako man nga pagpanghangkat sa iya pagtuon ang natabo nga pandemya sa diin na delayed pa ini sang anom ka bulan.
Sa pihak sini, nangin matam-is naman ang bunga sang paghimakas ni Baylon matapos nga isa siya sa 1,906 nga mga nakapasar sa 3,434 ka mga nagkuha sang pasinawan nga ginpagwa sang Professional Regulation Commission (PRC).
