ILOILO CITY- Bugal sang isa ka manunudlo nga katapo sang Indigenous Peoples nga mapilian bilang part-time commissioner nga nagatiglawas sang Hiligaynon nga lengwahe sa Commission on Filipino Language.
Ini amo si Dr. Jesus Insilada sang Calinog Iloilo kag nagapungko man bilang Public School District Supervision sang Division of Iloilo.
Sa interview sang Bombo Radyo kay Insilada, iya ginpahayag nga tuman ang iya pagpasalamat sa pagsalig nga ginhatag ni Presidente Ferdinand Marcos, Jr., nga amo ang nagpirma sang iya appointment.
Suno kay Insilada, tuig 2000 sang nag-umpisa ang iya career sa patag sang edukasyon sa diin nangin volunteer teacher ini kag sang tuig 2005, nangin regular ini nga manunudlo.
Sa 24 ka tuig sini bilang isa ka manunudlo, ginapabugal sini nga mangin lyabe agud mas mapasanyog ang iya adbokasiya para sa edukasyon, kultura, kag namat-an nga pulong.
Ginpahayag ni Insilada nga 11 sila tanan ka mga commissioners kag bilang katapo sang lupon, isa siya sa mga maga-approve sang programa kag mga polisa kaangot sa Filipino Language.
