Nasiplatan ang duha ka Chinese maritime militia ships sa kalayuon nga 30 nautical miles halin sang baybayon sang Palawan isa ka adlaw antes ang pagsugod sang Balikatan 2024 sang Pilipinas kag Estados Unidos sang Amerika.
Suno sa American maritime expert Ray Powell nga anay US Air Force official kag defense attaché, ini nga militia ships ang nagkadto sa direksyon sang Mischief Reef matapos nga naglayag sa 24-nautical-mile zone sang Pilipinas.
Tumalagsahon nga akwasyon ini suno kay Powell nga posible isa ka mensahe antes ang Balikatan exercise.
Indi pa maathag kun ano ang tuyo sini nga mga barko sa West Philippine Sea apang posible suno sa iya nga konektado ini sa tuigan nga military exercise sang Pilipinas kag Amerika nga magasugod subong nga adlaw kag magalawig tubtub sa Mayo 10.
Nagapati man si Powell nga ang presensya sang Chinese maritime militia ships ang isa ka demonstrasyon. Posible suno sa iya nga ginapakita sang China sa Pilipinas nga kun magpauli na ang Americans pagkatapos sang military exercise, magapabilin gihapon ang China.
Nahibaluan nga masobra 16,000 ka myembro sang Armed Forces of the Philippines kag US military ang magapasakop sa training subong nga tuig; kun sa diin magaupod man ang Australian Defence Force kag sa una nga tion sa maragts sang Balikatan, maga-intra man ang French Navy.
14 ka mga nasyon ang magapasakop bilang observers nga amo ang Brunei, Canada, France, Germany, Great Britain, India, Indonesia, Japan, Malaysia, New Zealand, Republic of Korea, Singapore, Thailand kag Vietnam.
Iga-execute sang participants ang complex missions sa nagkalain-lain nga domains kaangay sang maritime security, sensing kag targeting, air kag missile defense, dynamic missile strikes, cyber defense kag information operations.
Ini nga 39th Balikatan nga amo ang pinakadaku nga exercise sang militar sang Pilipinas kag Amerika sa sulod sang apat ka dekada ang patigayunon sa Palawan kag Batanes nga malapit sa Taiwan kag West Philippine Sea, mga teritoryo nga pareho nga gina-angkon kag gina-monitor sang China.
