Imbitado ang mga opisyal sang Bureau of Immigration (BI), Department of National Defense (DND) kag local government units sa hearing sang Senado kaangot sa pagdamo sang Chinese students sa Cagayan.
Suno kay Senator Risa Hontiveros, patambungon ang national defense bangud nga nahamtang sa Cagayan ang site sang EDCA ukon Enhanced Defense Cooperation Agreement.
Pahayag ni Hontiveros, ang influx sang Chinese students ang posible nga isa na naman ka sahi sang “pastillas” bribery scheme kaangay sang natabo sa Chinese online gaming employees.
Ini nga scheme ang nabulgar sang 2020 kun sa diin involved ang immigration officers kag nakabaton sang suhol nga nakaputos sa puti nga papel kaangay sang pastillas.
Ang foreigners nga kalabanan Chinese ang nag-bribe sa immigration officers kag nakabaton sang special treatment sang nakasulod na sila sa Pilipinas, nakakuha sang Philippine visa kag sang ulihi nagtrabaho sa Philippine offshore gaming operators (POGO).
Pahayag ni Hontiveros, hulaton sini ang desisyon ni Senate President Juan Miguel Zubiri kun ano nga Senate committee ang maga-imbestigar kaangot sa ginpasar nga resolution agud padalman ang pagdagsa sang Chinese students.
Base sa reports, 4,600 ka Chinese students ang nagatinir sa Cagayan kag gina-alegar nga espiya sang Chinese military, apang gin-athag sang Bureau of Immigration nga 400 lamang ka Chinese students ang yara sa amo nga lugar bangud ang iban ang nag-avail sang distance learning program sang eskwelahan.
Una naman nga nagpanginwala ang eskwelahan nga 1,500 ka Chinese nationals ang nag-enrol sa ila institusyon nga amo naman ang nagdabok sa istorya nga posible nga may natabo nga baligyaanay sang diploma ukon degree.
Mahimo man nga maimbitar ang Commission of Higher Education sa Senate hearing suno sa senadora agud maklaro gid ang enrollment status sang ginatumod nga Chinese students.
