ILOILO CITY- Magapatigayon ang Archdiocese of Jaro sang isa ka symposium may kaangtanan sa pagtinguha agud ma-canonize ang Ilonggo nga ‘Servant of God’ nga si Amador Tajanlangit, Sr.
Si Tajanlangit ang tumandok sang Miagao, Iloilo nga ginbun-ag sang Abril 30, 1911 kag napatay sang Marso 9, 1977.
Patigayunon ang symposium nga may tig-ulo nga “An Exploratory Study of Amador Tajanlangit, Sr. and Various Phenomenal Signs by the Augustinian Legacy” sa Sta. Teresita Parish, sa Abril 27, umpisa las-nueve tubtob las- onse sang aga.
Sa interview sang Bombo Radyo kay Reverend Father Angelo Colada, director sang Commission on Social Communications sang Archdiocese of Jaro, iya ginpahayag nga ginakabig si Tajanlangit bilang isa ka “exemplary devotee of the Blessed Virgin Mother.”
Suno kay Father Colada, kilala man si Tay Amador bangud sa iya entusiasmo sa pag-engganyo sa mga tawo nga mas mapalapit sa Diyos paagi sa iya apostolic activities.
Ginpahayag nga ginagamit ni Tay Amador ang iya abilidad bilang ventriloquist agud ilugon ang tunog sang mga sapat para makaganyat sa mga tawo nga magtambong sa iya mga leksyon sa katesismo.
Si Tajanlangit man ang sa likod sang “Dawn Rosary” nga ginapalayag adlaw- adlaw, sa kada kaagahon, sa Bombo Radyo nga sa subong, ginapangamuyo na sa kada gab-i antes mag-sign-off.
