ILOILO CITY- Ipresentar sang isa ka Theology Professor ang pila ka ebidensya may kaangtanan sa mga ekstra- ordinaryo nga hitabo may kaangtanan sa ‘Servant of God’ nga si Amador Tajanlangit, Sr. nga amo ang ginatinguhaan sang simbahan nga ma-canonize agud mangin santo.
Sa Interview sang Bombo Radyo kay Prof. Reynold Navares nga amo ang nagpatigayon sang scientific research nahaungod sa mga milagro nga naangot kay Tajanlangit nga mas kilala sa hayo nga Tay Amador, iya ginpahayag nga sang tion sang ulihi nga bahin sang Second World War, nasalbar ni Tay Amador ang isa ka bata nga lalaki nga utdan kuntani sang ulo sang mga Hapones.
Base sa istorya, gintudluan ni Tay Amador ang bata sang isa ka pangamuyo sa tion sang emerhensiya. Matapos nga gin-utdan sang ulo ang amay sang bata kag siya na ang masunod, nagsinggit ang bata sang isa ka pangamuyo nga gintudlo ni Tay Amador kag hinali lang nagtunog ang telepono sang pinuno sang military kag ginmando ang paghilway sa bata gani nakaluwas ini sa kamatayon.
Ang isa pa ka milagro amo nga sang tion nga ang iya utod nga si Eddie ang nag-upod sa operasyon sang People’s Army batok sa Hapon, ginpabalunan ni Tay Amador ang iya utod sang rosary kag crucifix. Sang nagluntad ang engkwentro, lunsay nagkalamatay ang mga kaupdanan sini kag si Eddie lamang ang nakasalbar kag wala naigo sang bala.
Matapos naman napatay si Tay Amador, pila ka milagro ang na-recordk man kaangay sang pagpaayo niya sa 12-anyos nga babaye nga na-comatose matapos nadalasa sang salakyan. Ginpahayag nga nangadi ang himata sang bata samtang ginauyatan ang laragway ni Tay Amador kag milagroso nga naka-recover ang bata.
Isa naman ka tumalagsahon nga hitabo nga nasaksihan sang madamo nga tawo amo nga sang adlaw sang iya lubong, samtang ginadala pagwa sa Jaro Cathedral ang iya lungon, may nagtuhaw nga tatlo ka mga balangaw. May yara man sang tinulo sang ulan nga nagtupa sa mga tawo nga nag- upod sa prusisyon padulong sa patyo. Kapin sa 10,000 ka tawo ang nagtambong sa iya lubong.
Sang 1985, sang exhume ang iya lawas sa iya lulubngan, makatilingalahan nga intact ini sa gihapon.
Sang 1992, sang liwat ini nga gin-exhume, halos wala sang nagbag-o sa bangkay ni Tay Amador apang ang iya daan nga lungon ang gin-islan na sang salsalon.
Suno kay Prof. Navares, ini ang pila lamang kaundan sang iya research nga lakipan man sang mga testimoniya sang iban nga tawo sa patigayunon nga symposium sa Sta. Teresita Parish, sa Abril 27, umpisa las-nueve tubtob las- onse sang aga, may kaangtanan sa pagtinguha agud ma-canonize ang Ilonggo nga ‘Servant of God’ nga si Tay Amador.
