ILOILO CITY- Liwat nga gin-gamit sang scammer ang pangalan ni Iloilo City Police Office Director Police Colonel Joeresty Coronica.
Ang amo nga scammer ang nag-contact sa isa ka Iloilo City Councilor kag nagpakilala nga si Coronica kag nagapangita sang kontraktor nga mahimo ma-endorso sa city director.
Sa interview sang Bombo Radyo kay Coronica, iya ginpahayag nga gilayon nga nagpakig-angot sa iya ang amo nga konsehal gani natapna ang plano nga pagpanginto sang scammer.
Nagpaandam naman si Coronica sa publiko nga indi magpabiktima sa scammer kag mangita gid sang paagi nga makumpirma kun insakto ang ginapakilala nga identity sang tawo nga nagatawag ukon nagapadala sang mensahe.
Matandaan nga sang nagligad nga tuig, gin-gamit man ang pangalan ni Coronica sang scammer nga nagpakuno- kuno nga nagapangita ini sang supplier sang bugas.
