Ginklaro sang Balikatan exercise director nga wala sang problema kun makit-an ang presensya sang China kadungan sang military exercises sang Pilipinas kag Estados Unidos sang Amerika sa West Philippine Sea — sa kondisyon nga magasunod lamang ang amo nga pungsod sa international law.
Kahapon sang nagsugod ang maritime exercise sang militar sang Amerika kag Pilipinas ukon ang Balikatan kun sa diin masobra 16,000 ka mga soldado ang nagapasakop kag amo ang ginakabig nga pinakadaku nga exercise sang duha ka nasyon sa sulod sang apat ka dekada.
Ini man ang labing-una nga multilateral maritime exercise kag magalawig ini tubtub sa Mayo 4.
Ang mga nagapasakop nga barko ang naghalin sa Palawan kag magalayag sa sulod sang exclusive economic zone (EEZ) sang Pilipinas nga amo ang teritoryo nga gina-monitor kag ginaangkon man sang China.
Suno naman kay Philippine exercise director Major General Marvin Licudine, indi sini makumpirma APANG indi man mapanginwala ang report nga may presensya ang Chinese vessels sa West Philippine Sea bangud sa pagkamatuod, nakatukod na ang China sang estruktura sa amo nga area.
Wala sang problema suno kay Licudine basta nga sundon lang sang China ang layi kag ang ginkasugtan nga cooperative mechanisms.
Antes ang Balikatan, matandaan nga ginkumpirma ni anay US Air Force official kag ex-Defense Attache Ray Powell nga may duha ka maritime militia ships nga nagbiya sa military base sang China sa Mischief Reef kag nagtinir ini malapit sa Second Thomas Shoal sa sulod sang anum ka oras. Sunod nga naghulag ini nga mga barko sa 30 nautical miles ang kalayuon halin sa baybayon sang Palawan apang indi maathag kun ano ang tuyo sini sa amo nga teritoryo.#
