ILOILO CITY- Nanindugan ang Philippine Navy nga wala sang malisya sa pagpili sang decommissioned China-made nga Philippine oil tanker agud palugdangon sa ginapatigayon nga Balikatan Exercise ukon ang tuigan nga military drills sang Pilipinas kag Estados Unidos sang Amerika.
Suno kay Commodore Roy Vincent Trinidad, spokesperson sang Philippine Navy for the West Philippine Sea, natabuan lang ang pagpili sa MT Lake Caliraya bilang subject sang sinking activity.
Ang sinking exercise ang isa sa pinakaulihi kag pinakadako sa tatlo ka semana nga war games kag diri makit-an ang pagbuligay sang duha ka grupo sang militar kag mga assets agud mapalugdang ang oil tanker.
Una na ginkumpirma sang Pilipinas nga ang MT Lake Caliraya, nga ginatawag sadto nga BRP Lake Caliraya, ang mangin subject sang Balikatan drill.
Ini nga pagpili sa amo nga barko ang nagpataas sang kilay sang Beijing kag gintawag pa sang state-run nga Global Times nga isa ka newspaper nga ang tikang sang Pilipinas ang wala sang pulos kag nagapakita sang intensyon sang probokasyon.
Ang Caliraya ang gin-decommission sang Navy sang December 2020, upod sa iban nga daan nga vessels.
Suno kay Navy Chief Vice Admiral Toribio Adaci Jr., nagakaangay lamang ang pag- decommission sa Lake Caliraya agud indi na sila maggasto pa para sa maintenance sini.
Ang sinking activity ang patigayunon sa Ilocos Norte sa ulihi nga bahin sang Balikatan Exercise sa una nga semana sang Mayo.
