Wala ginkumpirma apang wala man ginpanginwala sang Philippine National Police (PNP) ang report nga naka-istorya na matuod ang International Criminal Court (ICC) sa 50 ka aktibo kag anay mga opisyal sang pulis nga naangot sa imbestigasyon sa kontrobersyal nga drug war sang anay Duterte administration.
Ang matigdas nga kritiko ni anay Presidente Rodrigo Duterte nga si anay Senador Antonio Trillanes IV ang nagsapubliko nga may yara siya sang masaligan nga impormasyon nga direkta nga naka-istorya ang ICC sa 50 ka mga pulis.
Suno pa kay Trillanes, pananglitan magpangindi ini nga mga pulis sa pag-kooperar sa mga imbestigador sang ICC, magapangatubang sila sang daku nga kunsekwensya kaangay sang pagpasaka sang ila status bilang suspek.
Kun amo na sini ang ila nga status, maga-resulta ini sa travel restrictions kag sa ulihi, mahimo maaresto paagi sa Interpol.
Nahibaluan nga base sa government records, yara sa 6,000 ka mga suspek sa iligal nga droga ang ginpangpatay sa gina-alegar shootout kontra sa mga otoridad.
Sabat naman ni PNP chief information officer Col. Jean Fajardo, nakahibalo ang PNP nga may imbestigasyon nga naangot sa anti-drug campaign sang Duterte administration. Apang gin-athag sini nga ang mandu lamang sang national government ang ila nga tumanon kun sa diin nauna na ginpahayag nga nagagana ang judicial system sa Pilipinas.
“From the start naman po ay malinaw po yung paninindigan ng inyong pambansang pulisya pagdating sa mga investigation. However with respect dun sa ICC investigation we will take our cue from the national government po,” suno kay Fajardo.
“Ang PNP naman po ay magmula nang nagkaroon ng investigation we coordinated at tumulong po tayo sa pag-iimbestiga at katulad ng stand ng ating national government ay naniniwala po ang pambansang pulisya eh we have a working judicial system,” dugang sini.
Sa pihak nga bahin, nagpahayag naman si Justice Secretary Jesus Crispin Remulla nga seryoso ang gobyerno sa mga lihok sini agud nga tapnaon ang extrajudicial killings kag itib-ong ang tawhanon nga kinamatarong.
Ginpaguwa sini ang statement kasunod sang 2023 report sang US Department of State kun sa diin ang EJK ang nagapabilin nga seryoso nga problema sa Pilipinas kag wala sang daku nga pagbag-o sa human rights situation sang pungsod.#
