Nagapanawagan ang isa ka human rights group kay President Ferdinand Marcos, Jr. nga paguwaon na sa presuhan ang 85-anyos nga si Gerardo Dela Peña nga amo ang ginakabig nga pinakatigulang nga political prisoner sa Pilipinas.
Kaangay sang programa nga naghilway sa madamo nga persons deprived of liberty agud mahawanan ang prison facilities, nagakabagay man suno sa grupo nga mapaguwa si Tatay Gerry bangud sa edad sini kag nagaluya na nga ikaayong lawas.
Suno pa sa Kapatid nga support group para sa political prisoners, indi lamang ini isyu sa hustisya kundi isa man ka humanitarian imperative.
Abril 23, kadungan sang kaadlawan ni Dela Peña, nagmartsa ang grupo sa Malacañang agud ihatag ang ila letters of appeal sa mga opisyal sa Palasyo.
12 ka tuig kag 21 ka adlaw na nga napreso ang amo nga tigulang base sa computation sang Board of Pardons and Parole halin sang Agusto 2023.
Na-aresto ang tigulang sa Vinzons, Camarines Norte sang Marso 21, 2013 kag na-convict sa edad nga 74.
Sa subong suno sa grupo, maluya na ang tigulang kag haluson na makakita kag makabati samtang yara ini sa New Bilibid Prisons Minimum Compound.
Ginahulat man ang mangin komento sang Department of Justice (DOJ) kaangot diri.
