ILOILO CITY- Ginbalabagan sang mga konsehal sang syudad ang pagpasar kuntani sang resolusyon nga nagakilala sa mga hinimuan ni anay Police Regional Office 6 Direcor Police Brigadier General Sydney Villaflor.
Si Iloilo City Police Office Director PCol Joeresty Coronica amo ang naghingyo sa konseho nga magpasar sang nasambit nga resolusyon nga gamiton kuntani para sa rekomendasyon kay Villaflor nga mangin recepient sang Cavalier Award nga pinakamataas nga pagkilala nga ginahatag sa myembro sang Philippine National Police.
Ginpaagi ini kay Councilor Sedfrey Cabaluna nga amo ang chairman sang Committee on Police Matters.
Sa interview sang Bombo Radyo kay Iloilo City Councilor Romel Duron, iya ginpahayag nga indi nila madali-dali nga mapasar ang resolusyon bangud kinahanglan nila anay usisaon si Villaflor kag masabat ang madamo nga palamangkutanon ilabi na ang natuhoy sa mga isyu sang siya pa ang regional director.
Suno kay Duron, pila sa mga isyu nga ini amo ang pagduging sang illegal gambling sa Western Visayas kun sa diin may na- involve pa nga personnel sang Philippine National Police apang ginpahayag nga ginpabay- an lang ini ni Villaflor kag wala napasakaan sang kaso ukon gindagdagan sang penalidad.
Pahayag pa sang konsehal, isa man sa mga ginhimo ni Villaflor sang una nga wala niya ginkumpormehan amo ang pagpamilit sang anay regional director nga magpatuman sang signal jamming sa Dinagyang Festival kag wala naman ini mauyunan ni Duron.
Dugang sang konsehal, mas maayo nga mag-atubang mismo si Villaflor sa ila sa konseho agud kumbinsihon sila kag kun mapaslawan si Villaflor, mismo si Duron ang magapamalabag nga magpasar sang amo nga resolusyon.
