ILOILO CITY- Inagurahan na subong nga adlaw, Abril 26, ang Heart and Lung Center Building sa Western Visayas Medical Center sa Mandurriao, Iloilo City.
Sa interview sang Bombo Radyo kay Rep. Baronda, iya ginpahayag nga pangunahan nanday Health Sec. Ted Herbosa, Sen. JV Ejercito, kag iban pa nga mga bisita ang blessing kag inagurasyon sang 6 ka panalgan nga edipisyo.
Suno sa kongresista nga magatambong man sa kahiwatan, dako ini nga kadalag-an para sa amo nga ospital kag para sa mga Ilonggo nga nagakinahanglan sang kaangay nga serbisyo.
Nahibaluan nga isa si Baronda sa nagduso para mapondohan sang P449 million ang amo nga proyekto sang Chief Political Affairs Officer pa lang ini sadto ni Sen. Ejercito tubtob nga nangin kongresista ini kag gintutukan tubtob matapos ang proyekto.
